മേപ്പാടിയിൽ കുട്ടികളുടെ ദ്വിദിന ക്യാമ്പ്

വയനാട്, ഉരുൾപൊട്ടൽ ദുരന്തത്തെ അതിജീവിച്ച ചൂരൽമല-മുണ്ടക്കൈ മേഖലയിലെ കുട്ടികൾക്കുവേണ്ടി രണ്ടുദിവസത്തെ ക്യാമ്പ് ഡിസംബർ 22,23 തീയതികളിൽ മേപ്പാടി സെന്റ് ജോസഫ്‌സ് ഹയർ സെക്കണ്ടറി സ്കൂളിൽ നടന്നു. മെഡിക്കൽ സർവീസ് സെന്ററിന്റെ ആഭിമുഖ്യത്തിൽ നടത്തിയ ക്യാമ്പിൽ 181 കുട്ടികൾ പങ്കെടുത്തു.
മാഡം ക്യൂറി മെഡിക്കൽ ആന്റ് എജ്യുക്കേഷണൽ ട്രസ്റ്റ് പ്രസിഡണ്ടും മെഡിക്കൽ സർവ്വീസ് സെന്റർ സെൻട്രൽ കമ്മിറ്റിയംഗവുമായ ഡോ.കെ.പി.ഗോദകുമാർ ക്യാമ്പ് ഉദ്ഘാടനം ചെയ്തു. ജൂലൈ 30ന് വയനാട് മുണ്ടക്കൈ, ചൂരൽമല പ്രദേശങ്ങ ളിലുണ്ടായ ഉരുൾപൊട്ടലിനെത്തുടർന്ന് മെഡിക്കൽ സർവീസ് സെന്റർ നാൽപ്പത്തിരണ്ടുദിവസം നീണ്ടുനിന്ന സൗജന്യമെഡിക്കൽ ക്യാമ്പ് മേപ്പാടി കേന്ദ്രീകരിച്ച് നടത്തിയിരുന്നു. ഉറ്റവരും സുഹൃത്തുക്കളും ഉപജീവനമാർഗ്ഗങ്ങളും നഷ്ടപ്പെട്ട് ജീവിതംതന്നെ അനിശ്ചിതത്വത്തിലായ ജനങ്ങളെ ദുരന്തം സൃഷ്ടിച്ച മാനസികാഘാതത്തിൽനിന്ന് മുക്തരാക്കുവാൻ സൈക്കോളജി, സൈക്യാട്രി വിഭാഗം ആ മേഖലയിൽ പ്രവർത്തനം തുടരുകയാണ്. ഈ പ്രവർത്തനങ്ങളുടെ തുടർച്ചയായും, ദുരന്തത്തിന്റെ ആഘാതത്തിൽനിന്നും ഇനിയും കരകയറിയിട്ടില്ലാത്ത കുട്ടികളുടെ മാനസികസ്വസ്ഥത വീണ്ടെടുക്കുന്നതിന്റെയും ആത്മവിശ്വാസത്തോടെയും പ്രതീക്ഷയോ ടെയും ജീവിതത്തെ നോക്കിക്കാണാൻ അവരെ പ്രാപ്തരാക്കു ന്നതിന്റെയും ഭാഗമായാണ് ദുരന്തബാധിത മേഖലയിലെ കുട്ടികൾക്കുവേണ്ടി രണ്ടുദിവസത്തെ ക്യാമ്പ് നടത്തിയത്.
മെഡിക്കൽ സർവീസ് സെന്റർ സംസ്ഥാന പ്രസിഡണ്ട് ഡോ.കെ.ഹരിപ്രസാദ് അധ്യക്ഷതവഹിച്ചു. സിസ്റ്റർ കരുണ, ഡോ.പ്രകാശൻ , അഡ്വ. അബ്ദുറഹ്മാൻ കാദിരി, ഷിനു, വി.ശ്രീജിത്, ടിൽസി ബെന്നി, നന്ദന, ക്യാമ്പ് കൺവീനർ എസ്.മിനി, എം.എ പുഷ്പ എന്നിവർ പ്രസംഗിച്ചു.
രണ്ട് ദിവസങ്ങളിലായി സംഗീതം, ചിത്രരചന, ഒറിഗാമി തുടങ്ങിയവയിൽ ശില്പശാലകൾ, പ്രഥമശുശ്രൂഷ, ദന്ത സംരക്ഷണം എന്നിവയിൽ വിദഗ്ദ്ധ ഡോക്ടർമാരുടെ ക്ലാസ്സുകൾ, മഹത് വ്യക്തിത്വങ്ങളെ പരിചയപ്പെടുത്തിക്കൊണ്ടുള്ള ക്ലാസ്സുകൾ, ‘പൊലിക’ നാടൻ പാട്ടു സംഘത്തിന്റെ കലാപരിപാടികൾ, സിനിമാ പ്രദർശനം, കുട്ടികളുടെ കലാപരിപാടികൾ, രക്ഷിതാക്കൾക്കുള്ള ക്ലാസ്സുകൾ എന്നിവ ക്യാമ്പിന്റെ ഭാഗമായി നടന്നു.
കെ.സദാനന്ദൻ, അരവിന്ദ് വേണുഗോപാൽ, ആമി എസ്, എസ്.അനന്തഗോപാൽ, പി.മണികണ്ഠൻ, ഹെലൻ തമ്പി, ഡോ.സുകന്യ കുമാർ, നിത്യ പയ്യെരി, സ്നേഹ മരിയ, റഹീസ് ആലുങ്കൽ, ഡോ.മേധ സുരേന്ദ്രനാഥ്, മിനി കെ.ഫിലിപ്പ് എന്നിവർ ക്ലാസ്സുകൾക്കും പരിശീലന കളരികൾക്കും നേതൃത്വം നൽകി. നൗഷിദ പി.കെ, റിയാസ് കള്ളാടി, ആർ. അജിത്‌, കെ.ജെ.ഷീല, ആർ.മാളു, ആർഷ രാജ്, സോണിയ ജോർജ്, റിൻസി ബെന്നി, എലിസബത്ത് കുര്യൻ, ഷബ്‌ന വി.എ, മുഹമ്മദ്‌ ഹബീബ് റഹ്മാൻ, അബ്ദുൽ സലാം, കെ.റഹീം എന്നിവർ ക്യാമ്പിന് നേതൃത്വം നൽകി.
ക്യാമ്പിൽ പങ്കെടുത്ത മുഴുവൻ കുട്ടികൾക്കും സർട്ടിഫിക്കറ്റും വായന പ്രോത്സാഹിപ്പിക്കുന്നതിന്റെ ഭാഗമായി എല്ലാ കുട്ടികൾക്കും പുസ്തകങ്ങളും വിതരണം ചെയ്തു.